గ‌త ఏడాది బ్రోచేవారెవ‌రురాతో మంచి హిట్ కొట్టి ఊపుమీద క‌నిపించిన విష్ణు.. దాని త‌ర్వాత తిప్ప‌రా మీసం అనే మ‌రో కొత్త ప్ర‌య‌త్నం ఏదో చేశాడు. కానీ అది దారుణ‌మైన ఫ‌లితం అందుకుంది. అయినా శ్రీవిష్ణు ఆగ‌ట్లేదు. త‌న స్ట‌యిల్లోనే ఇంకో కొత్త త‌ర‌హా సినిమాతో ప్రేక్ష‌కుల ముందుకు రావ‌డానికి రెడీ అవుతున్నాడు. విష్ణు న‌టిస్తున్న కొత్త సినిమా పేరు.. రాజ రాజ చోర.
విష్ణు గ‌త సినిమాల్లాగే ఇది కూడా వెరైటీ టైటిల్‌తో ఆక‌ర్షిస్తోంది. ఈ సినిమా కోసం మ‌రో కొత్త అవ‌తారం ఎత్తాడు విష్ణు. ఏదో పౌరాణిక నాట‌కం వేస్తూ అక్క‌డి నుంచి పారిపోతుంటే కిరీటం ఎగిరిపోయిన‌ట్లుగా ఫ‌స్ట్ లుక్ డిజైన్ చేశారు. టైటిల్‌కు త‌గ్గ‌ట్లుగా ఉంది ఫ‌స్ట్ లుక్. టైటిల్లో చోర అని ఉంది కాబ‌ట్టి హీరో ఇందులో దొంగ అయి ఉండొచ్చు. క్రైమ్ థ్రిల్ల‌ర్‌గా ఈ సినిమా తెర‌కెక్కుతుండే అవ‌కాశ‌ముంది.
ఎక్కువ‌గా కొత్త ద‌ర్శ‌కుల‌తో ప‌నిచేసే విష్ణు ఈ సినిమాతోనూ హాసిత్ గోలి అనే యువ ద‌ర్శ‌కుడిని ప‌రిచ‌యం చేస్తున్నాడు. పీపుల్స్ మీడియా అధినేత విశ్వ ప్ర‌సాద్.. అభిషేక్ అగ‌ర్వాల్‌తో క‌లిసి ఈ సినిమాను నిర్మిస్తున్నాడు. బ్రోచేవారెవ‌రురా త‌ర్వాత మ‌రోసారి విష్ణు సినిమాకు వివేక్ సాగ‌ర్ సంగీతాన్నందిస్తున్నాడు. వేస‌విలో ఈ చిత్రం ప్రేక్ష‌కుల ముందుకొస్తుంది.