‘నారప్ప’ చిత్రాన్ని జూలై 20న అమెజాన్ లో విడుదల చేయనున్నట్లు మేకర్స్ అధికారికంగా ప్రకటించారు. ఈ సందర్భంగా ఓల్డ్ మ్యాన్ గెటప్ లో ఉన్న వెంకటేష్ కు సంబంధించిన ఓ కొత్త పోస్టర్ ను రిలీజ్ చేశారు. ఇందులో బ్యాగ్రౌండ్ లో ఒక గ్రామంలోని ఇళ్ళు తగలబడటం కనిపిస్తోంది. సమాజంలోని కుల వ్యవస్థ గురించి ప్రస్తావించే ఈ చిత్రంలో వేర్వేరు షేడ్స్ ఉన్న పాత్రలో వెంకీ కనిపించనున్నారు. ఇందులో నారప్ప భార్య సుందరమ్మ పాత్రలో జాతీయ అవార్డు గ్రహీత ప్రియమణి నటించింది.
ఇప్పటికే విడుదలైన ‘నారప్ప’ సినిమా టీజర్ మరియు ఇతర ప్రమోషనల్ కంటెంట్ మంచి ఆదరణ తెచ్చుకుంది. మెలోడీ బ్రహ్మ మణిశర్మ ఈ చిత్రానికి సంగీతం సమకూర్చగా.. ఇటీవలే ‘చలాకీ చిన్నమ్మి’ అనే ఫస్ట్ సింగిల్ ను రిలీజ్ చేశారు. శ్యామ్ కె.నాయుడు సినిమాటోగ్రఫీ అందిస్తుండగా.. మార్తాండ్ కె.వెంకటేష్ ఎడిటింగ్ వర్క్ చేస్తున్నారు. గాంధీ నడికుడికర్ ఆర్ట్ డైరెక్టర్ గా వ్యవహరిస్తున్నారు. ఈ చిత్రంలో కార్తీక్ రత్నం – రావు రమేష్ – రాజీవ్ కనకాల కీలక పాత్రలు పోషిస్తున్నారు. ఈ చిత్రాన్ని ముందుగా థియేటర్స్ లోనే విడుదల చేయాలని నిర్ణయించినా.. కరోనా సెకండ్ వేవ్ కారణంగా వాయిదా పడింది. ఈ నేపథ్యంలో థియేట్రికల్ రిలీజ్ ని స్కిప్ చేసి ఓటీటీ వేదికగా రిలీజ్ చేయడానికి మేకర్స్ నిర్ణయించారు.