నటుడిగా ఎంట్రీ ఇవ్వబోతున్న దర్శకేంద్రుడు

వంద చిత్రాలకు పైగా దర్శకత్వం వహించిన దర్శకేంద్రుడు రాఘవేంద్ర రావు ఇప్పటి వరకు ఎంతో మందిని వెండి తెరపైకి తీసుకు వచ్చాడు. అప్పట్లో స్టార్స్‌ ఫ్యామిలీ నుండి హీరోలను పరిచయం చేయాలంటే అది కేవలం రాఘవేంద్ర రావు మాత్రమే చేయాలి అనే టాక్‌ ఉండేది. టాలీవుడ్‌ సినీ చరిత్రలో తనకంటూ ఒక ప్రత్యేక అధ్యయంనే సువర్ణ అక్షరాలతో లిఖించుకున్న రాఘవేంద్ర రావు ఇప్పటి వరకు వెండి తెరపై కనిపించింది లేదు. మొదటి సారి ఆయన నటించేందుకు సిద్దం అయ్యాడు. 70 ఏళ్ల వయసులో ఉన్న రాఘవేంద్ర రావు హీరో పాత్రను చేసేందుకు సిద్దం అయ్యాడట.

ఒకానొక సమయంలో ఆడియో వేడుకలు ఇతరత్ర వేడుకల్లో కనీసం ఒక్కటి రెండు మాటలు మాట్లాడేందుకు చాలా ఇబ్బంది పడ్డట్లుగా అనిపించే రాఘవేంద్రరావు ఆ తర్వాత తర్వాత ఎపిసోడ్‌ లకు ఎపిసోడ్‌ లు సౌందర్యలహరి చేశాడు. ఆ తర్వాత స్టేజ్‌ లపై కూడా మాట్లాడటం అలవాటు చేసుకున్నారు.

ఒకప్పుడు కెమెరా ముందుకు వచ్చేందుకు సిగ్గు పడ్డ రాఘవేంద్ర రావు ఇప్పుడు ఏకంగా హీరోగా నటించేందుకు అది కూడా 70 ఏళ్ల వయసులో సిద్దం అవ్వడం ఆశ్చర్యంగా ఉంది. రాఘవేంద్ర రావు నటుడిగా తెరంగేట్రం చేయబోతున్న సినిమాకు సంబంధించి పూర్తి వివరాలు అతి త్వరలో బయటకు రానున్నాయి. ఈ సినిమాలో ముగ్గురు హీరోయిన్స్ ను ఇప్పటికే ఎంపిక చేశారట. మొత్తానికి ఏదో భారీగానే ప్లాన్‌ చేశారు.