చిన్నా చిత‌కా సినిమాలు కొన్ని ధైర్యం చేసి చిత్రీక‌ర‌ణ పునఃప్రారంభించాయి. కానీ మ‌ళ్లీ భ‌య‌ప‌డి వెన‌క్కి త‌గ్గాయి. టీవీ సీరియ‌ళ్ల షూటింగ్స్ చేయ‌డం.. కొన్ని క‌రోనా కేసులు బ‌య‌ట‌ప‌డ‌టంతో భ‌య‌ప‌డి వాటికీ బ్రేక్ వేశారు.
హైద‌రాబాద్‌లో క‌రోనా ఉద్ధృతి అంత‌కంత‌కూ పెరుగుతండ‌టంతో నిర్మాత‌లు ధైర్యం చేస్తున్నా.. హీరోలైతే వ‌ద్దుబాబోయ్ అనేస్తున్నార‌ని.. అందుకే షూటింగ్స్ పునఃప్రారంభం కావ‌డం లేద‌ని తెలుస్తోంది. ఐతే మ‌న హీరోలు ఇలా భ‌య‌ప‌డుతుంటే.. తెలుగు వాళ్ల‌కు కూడా బాగా ప‌రిచ‌యం ఉన్న క‌న్న‌డ సూప‌ర్ స్టార్ సుదీప్.. వ‌చ్చి హైద‌రాబాద్‌లో త‌న సినిమా షూటింగ్ మొద‌లుపెట్ట‌డం విశేషం. కొన్ని నెల‌ల విరామం త‌ర్వాత అత‌ను మ‌ళ్లీ మేక‌ప్ వేసుకున్నాడు.
త‌న కొత్త చిత్రం ఫాంట‌మ్ షూటింగ్‌ను హైద‌రాబాద్‌లోని అన్న‌పూర్ణ స్టూడియోలో మొద‌లుపెట్టాడు. రంగిత‌రంగ లాంటి అవార్డ్ విన్నింగ్ మూవీ తీసిన అనూప్ బండారి ఈ చిత్రానికి ద‌ర్శ‌కుడు. మ‌ళ్లీ షూటింగ్‌లో పాల్గొన్న సంద‌ర్భంగా ఆ ఎగ్జైట్మెంట్‌తో ఒక చిన్న వీడియో కూడా వ‌దిలాడు సుదీప్. మ‌న‌వాళ్లు క‌రోనాకు భ‌య‌ప‌డుతుంటే.. ఓ క‌న్న‌డ హీరో ఇలా హైద‌రాబాద్ వ‌చ్చి త‌న సినిమా షూటింగ్ చేయ‌డం ఆశ్చ‌ర్యం క‌లిగించే విష‌య‌మే.