విక్టరీ వెంకటేష్ ప్రస్తుతం తమిళ రీమేక్ అసురన్ లో నటిస్తోన్న విషయం తెల్సిందే. ఈ సినిమా షూటింగ్ శరవేగంగా సాగుతుండగా లాక్ డౌన్ కారణంగా బ్రేకులు పడింది. ఈ చిత్రానికి నారప్ప అనే టైటిల్ ను కన్ఫర్మ్ చేసారు. సురేష్ ప్రొడక్షన్స్ ఈ చిత్రాన్ని నిర్మిస్తోంది. షూటింగ్ మొదలవ్వడానికి ముందు ఈ సినిమాకు సంబంధించిన ఫస్ట్ లుక్ పోస్టర్స్ ను విడుదల చేయగా వాటికి విపరీతమైన రెస్పాన్స్ వచ్చింది. రీసెంట్ గా ఈ సినిమాలో వెంకటేష్ పెద్ద కొడుకుగా కేరాఫ్ కంచెరపాలెం ఫేమ్ రత్నం నటిస్తున్నట్లు అధికారికంగా ప్రకటించారు. ఈ చిత్రం తర్వాత వెంకటేష్ ఎఫ్ 2 సీక్వెల్ ఎఫ్ 3 లో నటించాల్సి ఉంది.
ఇది కాకుండా ఇప్పుడు వెంకటేష్ పేరు మలయాళ సినిమా రీమేక్ కు వినిపిస్తోంది. వెంకటేష్ అయ్యప్పనుమ్ కోషియుమ్ అనే మలయాళ చిత్ర రీమేక్ లో నటించబోతున్నాడు అంటూ ఇటీవలే ఒక రూమర్ మొదలైంది. సితార ఎంటర్టైన్మెంట్స్ ఆ మలయాళ సినిమా రీమేక్ ను నిర్మించనుంది. గత కొంత కాలం నుండి ఈ సినిమా రీమేక్ లో రానా, రవితేజ నటించబోతున్నట్లు ప్రచారం జరుగుతోంది. అయితే రీసెంట్ గా రవితేజ ప్లేస్ లో వెంకటేష్ పేరు వినిపిస్తోంది. మరి ఇందులో ఏది నిజమో తెలియాలంటే అధికారిక ప్రకటన వచ్చేవరకూ వేచి చూడక తప్పదు.