ఈ బలహీనతకు తోడు.. హీరో మారడం, ఇంకొన్ని కారణాలు తోడై ఈ సినిమా పట్టాలెక్కడానికి బాగా టైం పట్టేసింది. అంతా సిద్ధం చేసుకుని వేసవిలో షెడ్యూల్ వేసుకుంటే.. కరోనా మహమ్మారి కారణంగా బ్రేక్ పడిపోయింది. మళ్లీ ఎప్పుడు షూటింగ్ మొదలవుతుందో తెలియని పరిస్థితి. ఈ ఖాళీ సమయంలో ప్రి ప్రొడక్షన్ పనులు మరింత పక్కాగా చేసుకునే పనిలో ఉంది చిత్ర బృందం. ఇలాంటి సమయంలో చిత్రం బృందానికి పెద్ద షాక్ తగిలినట్లు వార్తలొస్తున్నాయి.
‘పుష్ప’ నుంచి విజయ్ సేతుపతి తప్పుకోనున్నట్లు సమాచారం. ఇందుక్కారణం డేట్ల సమస్యేనట. తమిళంలో బిజీయెస్ట్ యాక్టర్లలో ఒకడు విజయ్ సేతుపతి. అతడి చేతిలో రెండంకెల సంఖ్యలో సినిమాలున్నాయి. వాటన్నంటికీ డేట్లు కేటాయించడం తలకు మించిన సమస్యగా ఉందట. అతి కష్టం మీద బన్నీ-సుక్కు సినిమాకు డేట్లు కేటాయించగా.. ఇప్పుడు కరోనా ఎఫెక్ట్‌తో అవి వృథా అయిపోయాయి.
ఈ ఏడాది ద్వితీయార్ధంలో వేరే సినిమాలకు కాల్ షీట్లు ఇచ్చేశాడు విజయ్. ఇటు చూస్తే సుక్కుతో సినిమా అంటే ఒక పట్టాన ముగియదు. ప్లానింగ్ మారిపోతుంటుంది. అనుకున్నదానికంటే ఎక్కువ డేట్లు ఇవ్వాల్సి ఉంటుంది. ఐతే ముందు కేటాయించిన డేట్లే వృథా అయిపోతుండటంతో విజయ్.. కొన్ని సినిమాలు వదులుకుని ‘పుష్ప’లో నటించాల్సి ఉంటుంది.
ఒక్క సినిమా కోసం అంత త్యాగం చేయడం కరెక్ట్ కాదని భావించి అతను ఈ సినిమా నుంచి తప్పుకోవడానికి నిర్ణయించుకున్నాడట. ఐతే సుక్కు ఆలోచన మాత్రం ఈ పాత్రలో ఓ తమిళ నటుడినే పెట్టాలనేదేనట. అరవింద్ స్వామి, బాబీ సింహాల పేర్లను ఆయన పరిశీలిస్తున్నట్లు సమాచారం.