మేజర్ ముకుంద్‌ బయోపిక్‌గా రూపొందిన ‘అమరన్‌’ సినిమా బాక్సాఫీస్‌ వద్ద భారీ విజయాన్ని సొంతం చేసుకుంది. శివ కార్తికేయన్‌, సాయి పల్లవి ముఖ్య పాత్రల్లో నటించిన ఈ సినిమాకు రాజ్‌కుమార్‌ పెరియసామి దర్శకత్వం వహించగా కమల్‌ హాసన్ ఒక నిర్మాతగా వ్యవహరించారు. మీడియం రేంజ్ సినిమాగా రూపొందిన ‘అమరన్‌’ సినిమా బాక్సాఫీస్‌ వద్ద రూ.100 కోట్ల వసూళ్లు నమోదు చేస్తే గొప్ప విషయం అని అంతా భావించారు. కానీ ‘అమరన్‌’ సినిమా ఏకంగా రూ.300 కోట్ల వసూళ్లు నమోదు చేసింది. ఈ నెంబర్‌ మరింతగా పెరిగే అవకాశాలు పుష్కలంగా ఉన్నాయంటూ బాక్సాఫీస్‌ వర్గాల వారు మాట్లాడుకుంటున్నారు.

సోషల్‌ మీడియాలో అమరన్‌ సినిమా రూ.300 కోట్ల క్లబ్‌లో చేరింది అంటూ అభిమానులు సంతోషం వ్యక్తం చేస్తున్నారు. హీరో శివ కార్తికేయన్‌ అభిమానులు రూ.300 కోట్ల పోస్టర్‌ను తయారు చేసి సోషల్‌ మీడియాలో షేర్‌ చేశారు. ఫ్యాన్‌ మేడ్‌ పోస్టర్స్ కావడంతో అందులో కేవలం శివ కార్తికేయన్ మాత్రమే ఉన్నాడు. సినిమాకు అత్యంత కీలకం అయిన సాయి పల్లవి ఫోటోను అందులో పెట్టక పోవడంను చాలా మంది తప్పుబడుతున్నారు. మొదట ఆ పోస్టర్‌ను యూనిట్‌ సభ్యులు అధికారికంగా విడుదల చేసిన పోస్టర్‌గా కొందరు భావించి తీవ్రమైన పదజాలతో విమర్శించడం మొదలు పెట్టారు. అందులో సింగర్‌ చిన్మయి కూడా ఉన్న విషయం తెల్సిందే.

అమరన్‌ రూ.300 కోట్ల వసూళ్ల పోస్టర్‌లో సాయి పల్లవి ఫోటో లేకపోవడంపై చిన్మయి స్పందిస్తూ.. దక్షిణ భారతంలో అత్యంత ప్రముఖ నటి, ఎంతో మంది అభిమానం సొంతం చేసుకున్న సాయి పల్లవి ఫోటో ఇప్పటికీ తన హిట్‌ సినిమా పోస్టర్‌లో లేక పోవడం విడ్డూరంగా ఉంది. సినిమాకు పాజిటివ్‌ టాక్‌ ఆమె వల్ల వచ్చింది, సినిమాలో ఆమె నటనకు మంచి మార్కులు పడ్డాయి, సినిమా హిట్‌ కావడంలో ఆమె పాత్ర కీలకం అయినా ఆమెను పట్టించుకోలేదు అంటూ కొందరు తీవ్ర స్థాయిలో విమర్శలు చేయడం జరిగింది.

ఆ పోస్టర్‌ యూనిట్‌ సభ్యులు అధికారికంగా విడుదల చేసింది కాదు అంటూ సోషల్‌ మీడియా ద్వారా కొందరు ఆమెకు చెప్పే ప్రయత్నం చేశారు. ఆ విషయం తెలిసిన తర్వాత ఆమె అదే తరహాలో స్పందించారు. హీరోయిన్స్‌కు ప్రాముఖ్యత ఇవ్వడం లేదు అంటూ ఆమె ఆవేదన వ్యక్తం చేస్తూ మరో పోస్ట్‌ను షేర్ చేయడం జరిగింది. చిన్మయి మాత్రమే కాకుండా మరికొందరు ఈ విషయమై స్పందిస్తూ ఉన్నారు. అమరన్‌ విజయంలో కచ్చితంగా సాయి పల్లవి పాత్ర కీలకం అనడంలో సందేహం లేదు. ఈ సినిమానే కాకుండా గతంలో ఆమె నటించిన ప్రతి సినిమా విజయంలోనూ కీలక పాత్ర పోషించింది అంటూ ఫ్యాన్స్‌ కొత్త చర్చకు తెర తీశారు. సాయి పల్లవి ప్రస్తుతం తండేల్‌ సినిమాతో రాబోతుంది. నాగ చైతన్య హీరోగా నటిస్తున్న ఆ సినిమా ఫలితంపై అందరి దృష్టి ఉంది.