టాలీవుడ్‌లో మంచి నటుడిగా గుర్తింపు తెచ్చుకున్న సత్యదేవ్ హీరోగా మంచి హిట్ కోసం చాలా కాలంగా ప్రయత్నిస్తున్నారు. ప్రతిసారి డిఫరెంట్ కథలతో ముందుకు వస్తూ తన టాలెంట్‌ని నిరూపించుకుంటున్నా, ఆయనకు హీరోగా పూర్తి స్థాయి సక్సెస్ అందడం లేదు. అయినా, వెనక్కి తగ్గకుండా అవకాశాలను సద్వినియోగం చేసుకుంటూ, తన ప్రయాణాన్ని కొనసాగిస్తున్నారు.
సత్యదేవ్ ప్రస్తుతం హీరోగా ప్రయత్నాలు కొనసాగిస్తూనే, వేరే హీరోల సినిమాల్లో కీలక పాత్రలు చేస్తూ ప్రేక్షకుల్లో తన క్రేజ్‌ను పెంచుకునే దిశగా అడుగులు వేస్తున్నారు.
ఇస్మార్ట్ శంకర్ సినిమాలో చేసిన పాత్రకు మంచి గుర్తింపు దక్కింది. ఇక మెగాస్టార్ చిరంజీవి నటించిన ‘గాడ్‌ఫాదర్‌’ సినిమాలో కూడా ఒక డిఫరెంట్ పాత్రలో కనిపించి మంచి గుర్తింపు తెచ్చుకున్నారు. అదే విధంగా, రాజమౌళి ‘ఆర్ఆర్ఆర్‌’లో కూడా చిన్న పాత్ర చేసినప్పటికీ, ఆ సీన్‌ మాత్రం ఫైనల్ కట్‌లో బయటకు రాలేదు.
అయితే, ఆయన సపోర్టింగ్ రోల్స్ విషయంలో మాత్రం తగ్గడం లేదు. వెండితెరకు గ్యాప్ ఇవ్వకుండా ముందుకు సాగుతున్నారు. ఇటీవల విజయ్ దేవరకొండ, గౌతమ్ తిన్ననూరి కాంబినేషన్‌లో తెరకెక్కుతున్న సినిమాలో సత్యదేవ్ ఒక కీలక పాత్రలో నటిస్తున్నారని సమాచారం. ఈ పాత్ర కథలో ప్రధానంగా ఉండి, సత్యదేవ్ నటనకు పెద్ద ప్లస్‌గా మారే అవకాశం ఉందని చెబుతున్నారు. నేటి ట్రెండ్‌ను అనుసరించి, కథకు బలం చేకూర్చే పాత్రల పట్ల మన హీరోలు మరింత ఆసక్తి చూపుతున్నారు. ఇదే పరిస్థితి సత్యదేవ్‌కి కూడా అనుకూలంగా మారే అవకాశాలు కనిపిస్తున్నాయి.
గతంలో కొందరు హీరోలు ఇలాగే హీరోగానే కాకుండా, సపోర్టింగ్ రోల్స్ చేస్తూ ప్రేక్షకులకు మరింత దగ్గరయ్యారు. ప్రస్తుతం ప్రేక్షకుల అభిరుచులు మారడంతో కథల్లోని సపోర్టింగ్ పాత్రలు కూడా ప్రధాన పాత్రలతో సమానమైన ప్రాధాన్యతను పొందుతున్నాయి.
ఈ మార్పును సత్యదేవ్ ఎప్పటికప్పుడు గమనించి, తనను తాను కొత్తగా ఆవిష్కరించుకుంటున్నారు. విజయ్ దేవరకొండ సినిమా పై మంచి అంచనాలు ఉండటంతో, ఆ సినిమాలో సత్యదేవ్ పాత్ర హైలైట్ అవుతుందనే నమ్మకం ఉంది. ఈ సినిమా హిట్ అయితే, సత్యదేవ్‌కి మరిన్ని ఆఫర్లు రాకపోక తప్పదు. ఇలాంటి రోల్స్ ద్వారా సత్యదేవ్ తన టాలెంట్‌ని మరింత మంది ప్రేక్షకులకు చాటుకుంటే, భవిష్యత్తులో హీరోగా పెద్ద అవకాశాలు రావచ్చు. మొత్తానికి, సపోర్టింగ్ రోల్స్ తో కొత్త మార్గం వెతుక్కుంటూ, తన ప్రయాణంలో సత్యదేవ్ అడుగులు జాగ్రత్తగా వేస్తున్నారు. ఒక నమ్మకమైన నటుడిగా తన స్థానం సుస్థిరం చేసుకోవడానికి అతను చేస్తున్న ఈ ప్రయత్నాలు ఫలిస్తే, కెరీర్‌ మరింత ఊపందుకోవడం ఖాయం.
