శుక్రవారం హైదరాబాద్‌లో జరిగిన యానిమల్ ప్రీ రిలీజ్ ఈవెంట్‌లో చిత్ర బృందంతో పాటు మరికొందరు ప్రత్యేక అతిథులు పాల్గొన్నారు. సూప‌ర్ స్టార్ మహేష్ బాబు, ద‌ర్శ‌క‌దిగ్గ‌జం ఎస్ఎస్ రాజమౌళితో పాటు రాజకీయ నాయకుడు, తెలంగాణ కార్మికశాఖ, ఉపాధి మంత్రి మల్లా రెడ్డి కూడా హాజరయ్యారు. అయితే వేదిక‌పై మ‌ల్లారెడ్డి స్పీచ్ ఆద్యంతం ఎంతో ఎమోష‌న‌ల్ గా సాగింది. `భారతదేశాన్ని తెలుగు పరిపాలిస్తోంది` అనే మాట‌తో ఆయన వివాదాన్ని రేకెత్తించారు.
ఆడియన్స్ సెక్షన్ నుంచి అందరూ చూస్తుండగానే మల్లా రెడ్డి వేదికపైకి ఎక్కాడు. క‌థానాయ‌కుడు, బాలీవుడ్ నటుడు రణబీర్ కపూర్‌ని ఉద్దేశించి మాట్లాడుతూ -“రణబీర్, నేను మీకు ఒక విషయం చెప్పాలనుకుంటున్నాను. వచ్చే ఐదేళ్లలో, తెలుగు వారు భారతదేశాన్ని, బాలీవుడ్, హాలీవుడ్‌ను శాసిస్తారు. మీరు కూడా వచ్చే ఏడాది హైదరాబాద్‌కు మారాలి. ఎందుకు? ఎందుకంటే ముంబై ఇప్పుడు పాతది. బెంగళూరులో ట్రాఫిక్ జామ్‌లు ఉన్నాయి. భారతదేశంలోని ఏకైక ప్ర‌సిద్ధ నగరం హైదరాబాద్…“ అని వ్యాఖ్యానించాడు. తెలుగు కళాకారులు రాజమౌళి, మహేష్ బాబు, యానిమల్ దర్శకుడు సందీప్ రెడ్డి వంగా, రష్మిక మందన్నలను కూడా ఈ వేదిక‌పై ప్రశంసించాడు.
మల్లా రెడ్డి స్పీచ్‌తో తెలుగు సినిమా అభిమానులు, ట్విటర్ (ఎక్స్‌) మొత్తం `ఇబ్బంది`కి గురయ్యాయి. రణబీర్ కపూర్, అనీల్ కపూర్ లాంటి హిందీ అగ్ర‌తార‌ల ఎదుట మంత్రి మ‌ల్లారెడ్డి వ్యాఖ్య‌లు చ‌ర్చ‌నీయాంశంగా మారాయి. అయితే ఈ ఎపిసోడ్ లో చాలా మంది రణబీర్ గురించి ప్ర‌స్థావిస్తూ అతడిని మెచ్చుకున్నారు. “అంత ఓపికగా ఉన్నందుకు రణబీర్‌కు హ్యాట్సాఫ్“ అని ఒకరు రాశారు. “హిందీ మాట్లాడే స్నేహితులందరికీ, అతను రాజకీయ నాయకుడు. ఆయనకు ఓట్లు కావాలి. చిటికెడు ఉప్పులా తీసుకోండి“ అని మరొకరు సిఫార్సు చేశారు. మరికొందరు కాస్త బాధపడ్డారు. “హిందీ ప్రేక్షకులు సౌత్ నటీనటులను .. వారి సినిమాలను ఎటువంటి తారతమ్యం లేకుండా ఇష్టపడతారు. కానీ ఇక్కడ, తెలుగు నాయకుడు బాలీవుడ్ ని, హిందీ ప్రేక్షకులను వెక్కిరించాడు. మనం ఈ వ్యక్తుల నిజమైన ఆకత్ చూపించాలి“ అని ఒకరు వ్యాఖ్యానించారు.
ప్రతి ఒక్కరూ #డుంకీ చూడండి… `స‌లార్‌కి బదులుగా. మన పరిశ్రమకు మద్దతుగా ఉందాం! #Bollywood pride of India అని వేరొక‌రు వ్యాఖ్యానించ‌గా, మల్లారెడ్డిని సీరియస్‌గా తీసుకోవద్దని మరికొందరు అన్నారు. “రిలాక్స్, మనం తెలుగు మాట్లాడే వాళ్ళం.. అతడిని సీరియస్‌గా పరిగణించము. అంత చింత ఎందుకు? స‌రిహ‌ద్దుల పేరుతో ఎప్పుడూ వివాదాలు సృష్టించవద్దు“ అని ఒక వ్యక్తి రాశాడు. అనిల్ కపూర్ – బాబీ డియోల్ త‌దిత‌రులు నటించిన `యానిమల్` డిసెంబర్ 1న విడుదల కానుంది. ఇది 3.20 గంటల రన్ టైమ్‌తో సుదీర్ఘ నిడివితో ఉంది. సెన్సార్ A రేటింగ్ ని ఇచ్చింది
