స్టైలిష్ స్టార్ అల్లు అర్జున్ గత కొన్నేళ్లుగా ప్యాన్ ఇండియా సినిమా చేయాలని అనుకుంటున్నాడు. అయితే అందుకు సరైన సందర్భం రావట్లేదు. ఇక ఇప్పుడు అల వైకుంఠపురములో చిత్రంతో బ్లాక్ బస్టర్ హిట్ సాధించాడు బన్నీ. ఈ సినిమా టాలీవుడ్ లో నాన్ బాహుబలి రికార్డులను తిరగరాసింది. ఈ సినిమా అవ్వడానికి రీజినల్ సినిమానే అయినా బాలీవుడ్ ప్రేక్షకుల దృష్టిని బాగా ఆకర్షించింది. నెట్ ఫ్లిక్స్ లో ఈ సినిమా రిలీజైనప్పుడు ఇండియా వైడ్ గా ఈ చిత్రం బాగా ట్రెండ్ అయింది. ఈ సినిమాలోని పాటలను కూడా నార్త్ ప్రేక్షకులు అమితంగా ఇష్టపడ్డారు.
ఇక ఇప్పుడు పుష్ప సినిమాతో అల్లు అర్జున్ బాలీవుడ్ ఎంట్రీ కన్ఫర్మ్ అయిపొయింది. ఈ సినిమాను తెలుగు, తమిళ్ తో పాటు హిందీలో కూడా విడుదల చేస్తామని ప్రకటించారు. అల్లు అర్జున్ బాలీవుడ్ లో డైరెక్ట్ ఎంట్రీ ఇస్తుండడంతో చాలా మంది తన గురించి తెలుసుకునే ప్రయత్నం చేస్తున్నారు.
అసలు బన్నీ బాలీవుడ్ సినిమాలను ఫాలో అవుతాడా? ఒకవేళ అయితే తన ఫేవరేట్ హిందీ సినిమాలు ఏంటి? అన్న ప్రశ్నకు ఇప్పుడు సమాధానం దొరికింది. అల్లు అర్జున్ అన్ని భాషల చిత్రాలు చూడటానికి ఇష్టపడతాడు. అలాగే హిందీ సినిమాలు కూడా. తన ఫేవరెట్ సినిమాలు మాత్రం బాలీవుడ్ లో మూడు ఉన్నాయని చెబుతున్నాడు.
ముందుగా ఆమీర్ ఖాన్ నటించిన వో జీతా వహీ సికందర్ సినిమాను ఎన్ని సార్లు చూసానో లెక్కే లేదని అంటున్నాడు. ఈ సినిమా ఎప్పటికీ తన ఫేవరెట్ సినిమాల లిస్ట్ లో ఉంటుందని చెబుతున్నాడు. అలాగే కింగ్ ఖాన్ షారుఖ్ ఖాన్ ఐకానిక్ మూవీ దిల్వాలే దుల్హనియా లే జాయేంగే సినిమాను కూడా దాదాపు 20 సార్లకు పైగా చూసుంటానని చెబుతున్నాడు. ఇక రీసెంట్ గా విడుదలైన గల్లీ బాయ్ ప్రస్తుతం తన ఫేవరెట్ అని, ఇప్పటికే ఈ చిత్రాన్ని నాలుగైదు సార్లు చూశానని అంటున్నాడు బన్నీ.
