1-నేనొక్కడినే చిత్రంతో సైలెంటుగా టాలీవుడ్ లో అడుగుపెట్టింది కృతిసనోన్. ఈ బ్యూటీ ఎంపికపై సుకుమార్ పై తీవ్ర విమర్శలొచ్చాయి. అయితే సినిమా రిలీజయ్యాక సీన్ మొత్తం మారిపోయింది. సుకుమార్ ఎంపిక సరైనదేనంటూ కితాబిచ్చారు క్రిటిక్స్. అంత గొప్ప పెర్ఫామెన్స్ తో మెప్పించింది కృతి సనోన్. 1-నేనొక్కడినే ఫ్లాపైనా కానీ కృతి హిట్టయ్యింది. 1-నేనొక్కడినే సంక్రాంతి బరిలో రిలీజ్ కాగా అదే సీజన్ లో వచ్చిన ఎవడు పెద్ద హిట్టయ్యింది. అందులో నటించిన శ్రుతిహాసన్ కి మంచి పేరొచ్చింది.
ఇకపోతే కృతి సనోన్ తెలుగులో దోచేయ్ అనే చిత్రంలో నటించాక మరో ఫ్లాప్ ని ఎదుర్కొని బాలీవుడ్ కి జంప్ అయ్యింది. అక్కడా నిన్నమొన్నటి వరకూ అంతంత మాత్రమే. హిట్లు లేవు. కానీ నటిగా అవకాశాలకు కొదవేమీ లేదు. ఇవన్నీ ప్రతిభను చూసి ఇస్తున్నవే. ప్రస్తుతం కృతి సనన్ బాలీవుడ్ లో అత్యంత డిమాండ్ ఉన్న నటీమణులలో ఒకరిగా వెలిగిపోతున్నారు. ఇటీవల `మిమి` విజయం తరువాత తన రేంజు మారింది. తదుపరి ప్రభాస్ ఆదిపురుష్ 3డి సహా ఆరు భారీ బడ్జెట్ చిత్రాలతో బిజీ అయ్యింది. ఆదిపురుష్ లో కృతి సీతా దేవిగా నటిస్తున్న సంగతి తెలిసినదే.
తాజా సమాచారం మేరకు.. కృతి ఇటీవల కొత్త నల్ల రంగు మెర్సిడెస్-మేబాచ్ GLS 600 లగ్జరీ కారును కొనుక్కకుంది. దీనిని తనుకు తానే బహుమతిగా ఇచ్చుకుంది. ఈ కారు ధర రూ .2 కోట్లకు పైగా ఉన్నట్లు తెలుస్తోంది. కొద్ది రోజుల క్రితం ముంబైలోని మాడాక్ ఫిల్మ్స్ ఆఫీసులో కృతి తన క్లాసి న్యూ మెర్సిడెస్ కార్ తో కనిపించింది. ఫోటోగ్రాఫర్లు తనపై మెరుపులు మెరిపించగా ఆ ఫోటోలు వైరల్ అయ్యాయి.
