త‌మ సినిమాల‌కూ, ఫ్యామిలీ సెంటిమెంట్ల‌కు సినిమా వాళ్లు ముడిపెట్ట‌డం మామూలే. చాలా మంది ఇలాంటి సెంటిమెంట్ల‌ను ఫాలో అయ్యారు. త‌మ ఇంట్లో వాళ్ల పేర్ల‌ను సినిమాల్లో ప్ర‌స్తావించే వాళ్లు కొంద‌రు, సినిమాల్లోని పేర్ల‌ను ఇంట్లో ఫాలో అయ్యే వారు మ‌రి కొంద‌రు. ఈ క్ర‌మంలో ఈ జాబితాలో చేరాడు ద‌ర్శ‌కుడు అనిల్ రావిపూడి.

ఇటీవ‌లే రిలీజ్ అయిన త‌న సినిమా లో హీరో క్యారెక్ట‌ర్ పేరునే త‌న త‌న‌యుడికి పెట్టుకున్నాడ‌ట ఈ ద‌ర్శ‌కుడు. స‌రిలేరు నీకెవ్వ‌రు సినిమాతో ఈ ద‌ర్శ‌కుడు సంక్రాంతి సంద‌ర్భంగా ప్రేక్ష‌కుల‌ను ప‌ల‌క‌రించిన సంగ‌తి తెలిసిందే. అందులో మ‌హేశ్ బాబు క్యారెక్ట‌ర్ కు అజ‌య్ కృష్ణ అంటూ పేరు పెట్టారు. మ‌హేశ్ సినిమాల్లో.. అజ‌య్ అనే పేరు కొన‌సాగుతూ వ‌స్తోంది. ఇది వ‌ర‌కూ కొన్ని సినిమాల్లో మ‌హేశ్ కు ఆ పేరే పెట్టారు. అలా హిట్ సెంటిమెంట్ మేర‌కే స‌రిలేరులో అత‌డికి ఆ పేరు పెట్టారేమో కానీ, ఇప్పుడు అదే పేరును త‌న త‌న‌యుడికి కూడా పెట్టుకున్నాడ‌ట అనిల్ రావి పూడి.

స‌రిలేరు నీకెవ్వ‌రు సినిమా ఆడియో విడుద‌ల రోజునే అనిల్ కు కొడుకు పుట్టాడ‌ట‌. ఆ సినిమాలో మేజ‌ర్ అజ‌య్ కృష్ణ గొప్ప ల‌క్ష‌ణాల‌ను క‌లిగి ఉంటాడ‌ని, లాయ‌ల్టీ-డిసిప్లేన్- క‌రేజ్ క‌లిగి ఉండ‌టంతో పాటు మ‌హిళ‌ల‌ను గౌర‌వించ‌డంలో గొప్ప గుణాన్ని క‌లిగి ఉంటాడ‌ని… అందుకే అజ‌య్ కృష్ణ పేరును త‌న త‌న‌యుడికి పెట్టుకున్న‌ట్టుగా చెబుతున్నాడు ఈ ద‌ర్శ‌కుడు.