తెలుగులో డబ్ అయిన చిత్రాల్లో ఆల్ టైమ్ బ్లాక్ బస్టర్ అనే కేటగిరీ ఉంటే అది కచ్చితంగా విజయ్ ఆంటోనీ నటించిన బిచ్చగాడు సినిమాకే వర్తిస్తుంది. చాలా పరిమిత బడ్జెట్ లో తెరకెక్కిన ఈ సినిమా తమిళంలో సూపర్ హిట్ అయింది. తెలుగులో మాత్రం ఈ సినిమా రికార్డులను తిరగరాసిందనే చెప్పాలి. దాదాపు 18 కోట్ల షేర్ ను ఈ సినిమా వసూలు చేయడం విశేషం. పెట్టిన పెట్టుబడికి దాదాపు పదింతలు లాభం ఈ చిత్రంతో వచ్చింది.
ఒక డబ్బున్న వ్యక్తి అమ్మ కోసం బిచ్చగాడిగా నటించడమనే కాన్సెప్ట్ కొత్తగా ఉండడంతో ప్రేక్షకులు బ్రహ్మరధం పట్టారు. ఈ సినిమాలో సెంటిమెంట్ కూడా అదే స్థాయిలో పండడంతో తిరుగులేకుండా పోయింది. వెండితెర మీదే కాదు, బుల్లితెర మీద కూడా ఈ చిత్రానిదే హవా. మొదటిసారి ఈ చిత్రాన్ని టెలికాస్ట్ చేసినప్పుడు రికార్డ్ టిఆర్పి నమోదైంది. తెలుగులో సూపర్ హిట్ బడా స్టార్ల చిత్రాలు కూడా ఇంత టిఆర్పిలను చేజిక్కించుకోలేక పోతున్నాయి.
ఇప్పుడిదంతా ఎందుకంటే విజయ్ ఆంటోనీ బిచ్చగాడు సినిమాకు సీక్వెల్ ను ప్రకటించాడు. ఎప్పటినుండో ఈ చిత్రానికి సీక్వెల్ పై వార్తలు వస్తున్నాయి. ఈరోజు విజయ్ ఆంటోనీ పుట్టినరోజు సందర్భంగా ఈ చిత్ర ఫస్ట్ లుక్ ను విడుదల చేసారు. విజయ్ ఆంటోనీ స్వయంగా ఈ చిత్రాన్ని నిర్మిస్తుండగా ప్రియా కృష్ణస్వామి దర్శకత్వం వహిస్తారు. మిగతా వివరాలు త్వరలోనే తెలుస్తాయి.
