యూనివర్శిల్ స్టార్‌ కమల్ హాసన్ కాలికి ఆపరేషన్ అవసరం అంటూ ఇటీవలే ఒక ప్రకటనలో పేర్కొన్న విషయం తెల్సిందే. ఆ విషయం ప్రస్తుతం తమిళ సినీ వర్గాల్లో మరియు అభిమానుల్లో ఆందోళన కలిగిస్తుంది. ఒక వైపు అసెంబ్లీ ఎన్నికలు దగ్గరకు వస్తున్న సమయంలో కమల్ ఆపరేషన్ ఏంటీ అంటూ ఆయన పార్టీ నాయకులు ఆందోళన వ్యక్తం చేశారు. ఆపరేషన్ విషయమై ఆయన కూతుర్లు శృతి హాసన్ మరియు అక్షర హాసన్ లు క్లారిటీ ఇచ్చారు. నేడు ఉదయం నాన్న కు ఆపరేషన్ అయ్యిందని వారు ప్రెస్ నోట్‌ ద్వారా తెలియజేశారు.
చెన్నైలోని రామచంద్ర ఆసుపత్రిలో నాన్న కు ఆపరేషన్ జరిగింది. మీ అందరి ప్రార్థనలతో ఆపరేషన్ చాలా బాగా జరిగింది. తప్పకుండా ఆయన త్వరగా కోలుకుని మళ్లీ ఉత్తేజంతో మీ ముందుకు వస్తారు అంటూ ప్రెస్ నోట్‌ లో పేర్కొన్నారు. నాలుగు లేదా అయిదు రోజుల్లోనే ఆయన్ను డిశ్చార్జ్‌ చేయబోతున్నారట. కొన్ని రోజుల పాటు ఇంట్లో విశ్రాంతి తీసుకోవాల్సి ఉంటుందట. సుదీర్ఘ కాలంగా కాలి నొప్పితో బాధ పడుతున్న ఆయన ఇప్పుడు ఖాళీ సమయం ఉండటంతో ఆపరేషన్ కు సిద్దం అయ్యాడు. మొన్నటి వరకు తమిళ బిగ్ బాస్ సీజన్‌ 4 కు హోస్టింగ్ చేశాడు. హోస్టింగ్ సమయంలో కూడా కమల్ కుర్చీపై కూర్చునే ఉండే వారు. ఇకపై ఆయన మళ్లీ మునుపటి వేగంగా కదిలేందుకు ఈ ఆపరేషన్ ఉపయోపడుతుందని వైధ్యులు పేర్కొన్నారు.
