క్వీన్ కంగన రనౌత్ అంటేనే కొందరికి దడ. బాలీవుడ్ స్టార్ హీరో హృతిక్ రోషన్ సహా ఎందరో ప్రముఖ దర్శకనిర్మాతలు కంగన అంటేనే ఝడుసుకునే పరిస్థితి. బాలీవుడ్ ప్రముఖ దర్శకనిర్మాత కరణ్ జోహార్ అంతటి వాడే చివరికి కంగనకు ఓ సందర్భంలో సారీ చెప్పాల్సి వచ్చింది. మహేష్ భట్.. ఆలియా భట్ .. సంజయ్ లీలా భన్సాలీ.. కపూర్లు సైతం కంగన అంటే ఆలోచించుకునే పరిస్థితి. అప్పట్లో బాలీవుడ్ స్టార్ రైటర్ అపూర్వ అస్రానీతో గొడవ తెలిసినదే. అలాగే దిల్జీత్ దోసాంజ్ తోనూ కంగన తీవ్రంగా ఘర్షణ పడింది. ఇటీవల మహారాష్ట్ర పాలకులు శివసేన అధీశులనే ఏకేస్తోంది.
`మణికర్ణిక` డైరెక్టర్ కం రైటర్ క్రిష్ తోనూ కంగన ఫికర్ గురించి టాలీవుడ్ సర్కిల్స్ లో చర్చ సాగింది. ఆ సినిమాలో కొన్ని సీన్లు బాలేదని సన్నివేశాలను బాగా రాయలేదని కంగన సీరియస్ అయ్యింది. క్రిష్ తో ఘర్షణ వల్ల ఆయన తప్పుకోవడంతో తానే చివరికి మణికర్ణిక పెండింగ్ షూట్ కి డైరెక్ట్ చేసింది.
ఇలాంటి అరుదైన ట్రాక్ రికార్డ్ వేరొక హీరోయిన్ కి లేనే లేదు. అలాంటిది ఇప్పుడు ఒక రచయిత ఒక దర్శకుడిని కంగన ఎంతగానో పొగిడేయడం.. ఆ ఇద్దరి పట్లా తన ప్రేమాభిమానాల్ని ప్రదర్శించడం ఆశ్చర్యపరిచింది. ఇందుకు తలైవి ట్రైలర్ – ప్రీరిలీజ్ వేడుక సాక్ష్యంగా నిలిచింది.
అయితే ఈ వేదికపైనా ఒక వింత. స్టార్ రైటర్ విజయేంద్ర ప్రసాద్ మాట్లాడుతూ కంగనకు స్క్రిప్టు నచ్చకపోతే? అంటూ భయాన్ని వ్యక్తం చేశారు. తలైవి కోసం వేరొక కథానాయికను అనుకున్నా తాను మాత్రం కంగన పేరునే సూచించానని విజయేంద్ర ప్రసాద్ అన్నారు. అమ్మ జయలలిత బయోపిక్ స్క్రిప్ట్ రాసేందుకు ఓకే అన్న తర్వాత తనకు కంగన కరెక్ట్ అనిపించిందని విజయేంద్రుడు తెలిపారు. జయలలితగా కంగన అద్భుతంగా నటించిందని తాను ఏల్తుందని కూడా విజయేంద్రుడు ప్రశంసలు కురిపించారు. అయితే కంగన విషయంలో బాహుబలి రైటర్ విజయేంద్ర ప్రసాద్ అంతటివారే అంతో ఇంతో భయం వ్యక్తం చేశారంటే అర్థం చేసుకోవాలి. ఇక కంగన కేవలం నటి మాత్రమే కాదు.. రచయిత.. దర్శకురాలు కూడా. ఆల్ రౌండర్ నైపుణ్యంతో ఇండస్ట్రీని షేక్ చేస్తూ ఇప్పుడు యాక్షన్ క్వీన్ గానూ సూపర్ ఉమెన్ గానూ బరిలో దిగుతోంది. రియల్ లైఫ్ లోనూ శత్రువులను చీల్చి చెండాడే ఫైటర్ తను. ఇక పెద్ద తెరపై ఫైట్స్ చూసాక ఇంకా ఎందరు ఝడుసుకుంటారో ఏమిటో!!
