మహేష్‌ బాబు కెరీర్‌ ఆరంభం అయినప్పటి నుండి రెండు మూడు సార్లు మినహా ఎక్కువ సార్లు మే 31వ తారీకు అంటే సూపర్‌ స్టార్‌ కృష్ణ పుట్టిన రోజున ఏదో ఒక స్పెషల్‌ పోస్టర్‌ వీడియో లేదంటే మరేదైనా స్పెషల్‌ ప్రకటన చేయడం ఆనవాయితీగా వస్తూనే ఉంది. మహేష్‌ బాబు ఈసారి తన తండ్రి కృష్ణ బర్త్‌డేకు ఏం స్పెషల్‌ను ప్లాన్‌ చేస్తున్నాడు అనేది ఆసక్తికరంగా మారింది. ప్రస్తుతం మహేష్‌బాబు చేస్తున్న సినిమాలు ఏమీ లేవు. కనుక ఆయన నుండి ఈసారి కృష్ణ బర్త్‌డే స్పెషల్‌ ఏమీ ఉండదనుకున్నారు. కాని ఏదో స్పెషల్‌ రాబోతుందంటూ ఇండస్ట్రీ వర్గాల్లో ప్రచారం జరుగుతోంది.
సినీ వర్గాల్లో జరుగుతున్న చర్చ ప్రకారం మహేష్‌బాబు 27వ చిత్రం అధికారిక ప్రకటన ఈనెల 31న రాబోతుందట. అందుకు సంబంధించిన ఏర్పాట్లు జరుగుతున్నాయి. దర్శకుడు పరశురామ్‌ దర్శకత్వంలో మైత్రి మూవీస్‌ మరియు 14 రీల్స్‌ వారు ఈ సినిమాను నిర్మించబోతున్నారు. ఈ రెండు బ్యానర్‌లు కూడా ఏ చిన్న అకేషన్‌ ఉన్నా కూడా ఖచ్చితంగా ఏదో ఒక పోస్టర్‌ విడుదల చేయడం లేదంటే వీడియోను విడుదల చేయడం చేస్తూ ఉంటారు. కనుక ఈసారి కూడా మే 31కి ఫ్యాన్స్‌కు నిరుత్సాహం లేకుండా సినిమా ప్రకటిస్తున్నట్లుగా ఒక ప్రకటన వచ్చే అవకాశం ఉంది.
గత కొన్నాళ్లుగా మహేష్‌బాబు 27వ చిత్రం షూటింగ్‌ ఈ ఏడాది చివర్లో ప్రారంభం కాబోతుందంటూ వార్తలు వచ్చాయి. కరోనా కారణంగా ఇప్పటికే సినిమాను ఓకే చేయాల్సి ఉన్నా కూడా స్క్రిప్ట్‌ వర్క్‌ ఇంకా కొనసాగుతూనే ఉందట. అతి త్వరలోనే స్క్రిప్ట్‌ వర్క్‌ ఓకే అవుతుందని, అందుకే మే 31న ఖచ్చితంగా ఒక కీలక ప్రకటన వచ్చే అవకాశం మైత్రి మూవీస్‌ వారిపై నమ్మకం పెట్టుకుని ఫ్యాన్స్‌ ఎదురు చూస్తున్నారు. మరి వారి ఆశలపై మైత్రి మూవీస్‌ నీళ్లు జల్లేనా వారు కోరుకున్నట్లుగా ప్రకటన ఇచ్చేనా చూడాలి.
