ఒకప్పుడు ఒకే సమయంలో నారా రోహిత్ సినిమాలు తొమ్మిది దాకా లైన్లో ఉన్నాయి. అందులో కొన్ని చిత్రీకరణ పూర్తి చేసుకుంటే.. కొన్ని సెట్స్ మీద ఉన్నాయి. ఇంకొన్ని మొదలు కావాల్సి ఉంది. ఏడాదికి మూడు సినిమాల చొప్పున రిలీజ్ చేసుకుంటూ వెళ్లాడతను. అంత బిజీగా ఉన్న నటుడి నుంచి ఏడాదిన్నరగా ఒక్క సినిమా కూడా రాలేదు.
సినిమా రిలీజ్ సంగతలా ఉంచితే.. అసలు నారా రోహిత్ సినిమా ఏదీ షూటింగ్ కూడా జరుపుకోకపోవడం ఆశ్చర్యం కలిగించే విషయం. ఆ మధ్య ‘బాణం’ దర్శకుడు చైతన్య దంతులూరితో ఓ భారీ చిత్రం ప్రకటించాడు కానీ.. తర్వాత దాని ఊసు లేదు. అసలు రోహిత్ ఇండస్ట్రీలోనే కనిపించకపోవడానికి కారణాలేంటో అర్థం కాలేదు. ఐతే ఇటీవలే రోహిత్ ఓ కొత్త లుక్‌తో కనిపించి ఆశ్చర్యపరిచాడు. ఆ ఫొటోలు సోషల్ మీడియాలో హల్ చల్ చేశాయి. తాజాగా అతను ట్విట్టర్లోకి కూడా అడుగుపెట్టాడు.
ఇన్నాళ్లు ఎందుకు అదృశ్యమైంది.. ఈ కొత్త లుక్ సంగతులేంటి చెబుతూ ఓ ఇంగ్లిష్ డైలీకి ఇంటర్వ్యూ ఇచ్చాడు రోహిత్. తన సినిమాలు వరుసగా ఫెయిలవడం, అలాగే తన లుక్ తనకు నచ్చకపోవడం వల్లే ఈ గ్యాప్ తీసుకున్నట్లు రోహిత్ ఈ ఇంటర్వ్యూలో వెల్లడించాడు.
‘‘ఒకప్పటి నా లుక్ నాకే నచ్చేది కాదు. అందుకే ఏడాది పాటు సినిమాల నుంచి బ్రేక్‌ తీసుకున్నాను. నా ఫిట్‌నెస్‌ విషయంలో రెండేళ్ల నుంచి ఎంతో కష్టపడుతున్నాను. అందుకే ఇప్పుడు ఈ లుక్ లోకి వచ్చాను. బరువు తగ్గి కొత్తగా తయారయ్యాను. లాక్‌డౌన్‌ పూర్తయిన వెంటనే నా సినిమాలకు సంబంధించి రెండు పెద్ద ప్రకటనలు చేయబోతున్నాను. లాక్‌డౌన్‌ కారణంగా జిమ్‌ కు వెళ్లట్లేదు. ప్రతి రోజూ నేను ఇంట్లోనే వర్కౌట్లు చేస్తున్నాను. అలాగే డైట్‌ ఫాలో అవుతున్నాను. లాక్‌డౌన్‌ పూర్తయ్యేసరికి నేను మరింత ఫిట్‌ గా అవుతానని ఆశిస్తున్నాను’’ అని రోహిత్ చెప్పాడు.
