చూస్తుంటే సూపర్ స్టార్ మహేష్ అంటే పూరి జగన్నాథ్ కు పీకల దాకా కోపం ఉన్నట్లుంది. ఆ మధ్య ఒక ఇంటర్వ్యూలో మహేష్ తో మూడోసారి సినిమా ఎప్పుడు అని ప్రశ్నించగా, మహేష్ కేవలం హిట్ ఉన్న దర్శకులతోనే పనిచేస్తాడని సెలవిచ్చాడు పూరి. దానికి మహేష్ అభిమానులు తీవ్రంగా స్పందించారు. పోకిరికి ముందు, బిజినెస్ మ్యాన్ కు ముందు నువ్వు ప్లాపుల్లో ఉన్నా కూడా నీకు అవకాశాలు ఇచ్చాడు. ఇప్పుడు ఒక ప్రాజెక్ట్ సెట్ అవ్వలేదని ఇలా అంటున్నావా అని మహేష్ అభిమానులు హర్ట్ అయ్యారు.
మహేష్ – పూరి జగన్నాథ్ ది హిట్ కాంబినేషన్. పోకిరి ఇండస్ట్రీ హిట్ కాగా, బిజినెస్ మ్యాన్ కూడా బానే ఆడింది. అప్పట్లో జనగణమన అని మూడో ప్రాజెక్ట్ కోసం పూరి ప్రయత్నించినా ఎందుకో కుదర్లేదు. ఇప్పటికీ మహేష్ అభిమానులు మహేష్ తో పూరి సినిమా చేయాలని ఆకాంక్షిస్తారు.
అయితే పూరి జగన్నాథ్ మరోసారి మమ్మల్ని హర్ట్ చేసాడని మహేష్ అభిమానులు ఫీలవుతున్నారు. దానికి కారణం ఆస్ట్రేలియన్ ఓపెనర్ డేవిడ్ వార్నర్. ఇతగాడు టిక్ టాక్ లో హల్చల్ చేస్తున్న విషయం తెల్సిందే. నిన్న పోకిరి డైలాగ్ ను చెప్పి మహేష్ అభిమానులను ఖుషీ చేసాడు వార్నర్. ఆ వీడియోకు స్పందించిన పూరి జగన్నాథ్ ఈ డైలాగ్ నీకు సరిగ్గా సరిపోతుంది వార్నర్, నా సినిమాలో కామియో రోల్ చెయ్ అని అడిగాడు. వార్నర్ తో డైలాగ్ గురించి ప్రస్తావించిన పూరి, ఆ డైలాగ్ సినిమాలో చెప్పిన మహేష్ ను ట్యాగ్ చేయకపోవడం ఏమిటని మహేష్ అభిమానులు ఫీలవుతున్నారు. మరి ఈ ఇద్దరికీ ఎక్కడ చెడిందో!
