సోను సూద్ అనే పేరుకు టాలీవుడ్ లో పరిచయం అవసరం లేదు. అరుంధతిలో విలన్ గా చేసిన దగ్గరనుండి సోను సూద్ కు తెలుగులో పాపులారిటీ బాగా పెరిగింది. వరసగా టాలీవుడ్ లో సినిమాలు చేస్తూ వచ్చిన సోను సూద్ కు ఇటీవలే బాగా గ్యాప్ వచ్చింది. మహేష్ తో చేసిన ఆగడు తర్వాత ఇక్కడ ఎక్కువగా కనపడలేదు సోను సూద్. అయితే మళ్ళీ ఇన్నాళ్ళకి టాలీవుడ్ లో రీ ఎంట్రీ టైప్ ఇస్తున్నాడు.
మెగాస్టార్ చిరంజీవి, కొరటాల శివ దర్శకత్వంలో నటిస్తున్న ఆచార్య సినిమాలో సోను సూద్ కీలక పాత్ర పోషిస్తున్నాడు. ఈ సినిమా గురించి సోను సూద్ చాలా గొప్పగా అనుకుంటున్నాడు. కథాబలం ఉన్న చిత్రాలు అందించడం కొరటాల శివ స్పెషలిటీ. కేవలం హీరో పాత్ర మాత్రమే కాకుండా మిగిలిన పాత్రలను కూడా చక్కగా తీర్చిదిద్దుతాడు.
ఈ నేపథ్యంలో సోను సూద్ ఆచార్య గురించి మాట్లాడుతూ ఇందులో చాలా మంచి పాత్ర చేస్తున్నానని, చాలా కాలం తర్వాత మళ్ళీ తెలుగు సినిమాలో నటించడం ఆనందంగా ఉందని, ఇందులో నా పాత్ర నెగటివ్ ఆ పాజిటివ్ ఆ అన్న విషయం చెప్పలేనని, కానీ ఈ పాత్రను చాలా కాలం ప్రేక్షకులు గుర్తించుకుంటారని తెలిపాడు.
ఇక చిరంజీవితో కలిసి నటించడం అద్భుతమైన అనుభవమని, అంత పెద్ద స్టార్ అయ్యుండి కూడా తన వినయంగా సెట్స్ లో నడుచుకుంటారని, మెగా స్టార్ నుండి ఎన్నో విషయాలు నేర్చుకుంటున్నానని, మళ్ళీ తనతో త్వరగా పనిచేయాలని ఉందని, ఆచార్య షూట్ స్టార్ట్ అవ్వడం కోసం ఎదురుచూస్తున్నానని తెలిపాడు.
ఇటీవలే ఎక్కడ చూసినా సోను సూద్ పేరు మార్మోగిపోతోంది. తనను రియల్ హీరో అని అందరూ తెగ పొగిడేస్తున్నారు. ముఖ్యంగా మైగ్రంట్ లేబర్ ను ముంబై నుండి స్పెషల్ బస్సులు వేసి దేశంలోని వివిధ ప్రాంతాలకు తరలించిన విధానానికి హ్యాట్సాఫ్ చెప్పకుండా ఉండలేం.
